నా నెత్తురు వాగులై పారుతుంది
చాలాసార్లు
చావుదాకా పోయి తిరిగి వస్తుంటా
మరణించిన ప్రతిసారీ
పునర్జన్మ ఎత్తుతా
అమ్మ గుండెల మీద ఆడుతున్న
పసిపోరన్ని నేను
ఎండిపోయిన పాలిండ్లు
ఎల్తి గరిశెలు
అమ్మ కన్నీరు మంచు శిలలవుతూ
నా చెంపలపై రాలి పడుతూ ఉంటయి
జీవితం
చుక్క చుక్కా జుర్రుకునే మద్యం
ఏదీ అంతం కాదు
నీ రాక కోసం
తలుపులూ తెరిచే ఉంటాయి
బుద్ది ఎటు పోతుంది
లోపల గడియ వేశారనుకుంటావు
పిచ్చోడివో ఎర్రోడివో
జీవితం రుచి తెలియనివాడివో
లెక్కలూ పత్రాలూ ఉండవు
మాయలూ మర్మాలూ ఉండవు
గుండె ఒక్కటే ఉంటది
నీకు లేనిదీ నాకు ఉన్నదీ అదొక్కటే
రా, తలుపులూ తలంపులూ తెరిచే ఉన్నాయి
నెత్తురు రుచి మరిగినవాడా
నా నెత్తురు ధారలై పారుతున్నది
మోదుగాకు డొప్ప పట్టు
నీకు మద్యం, మగువ, మత్తు
అంతా నా నెత్తురే కదా
రిజర్వాయర్ల నిండా పట్టుకో
దఫాలు దఫాలుగా జుర్రుకో
సిగ్గుసెరం లేనోడా
నా మొల్దారాన్ని దండెం కట్టి
నా కండకండనూ దోర్నాలు కట్టినోడా
నీ కన్నా పసురం మేలు
No comments:
Post a Comment